Two poems by Nkateko Maluleke

Kula Kokwana

Ti dya ti ya endzhutini ka kokwana
Xikomu se xa hlomuka embhinyini
Ndima yona, u boxile
Mihandzu ya ntamu wa kwe ndzi dyile
U ndzi wundlile kokwana
U ndzi kombile rirhandzu swonghasi
U wile a pfuka na mina
A ndzi ongola loko ndzi vabya
A ndzi bebula hi ndzhovo,
A ndzi mbuwetela loko ndzi rila
A ndzi swekela switsongo
A ndzi kufumeta hi vuxika
Namunthla ndzi kurile kaa!
U ndzi kurisile hi rirhandzu mukhegula loyi
Ndza swi kota ku yima ndzi tihandzela,
Xi ndzi dyondzisile xikoxa lexi
Ndzi ba mandla ndzi vuyelela,
Ndzi khensa rirhandzu ra ku kokwana
A ndzi tava mani loko a wulo ndzi hlamba mandla?
Milawu a ndzi ta dyondzisa hi mani?

 
Xipiring!!!!

Xo ghi! ghi! ghi!
Senge kubiwa mancomani exifuveni
Nyuku ndzurururu!!!
Senge ndzilo wela hi mberha
Hi luya wa hundza
Fambelo ra kona, xiswi tongela bya sekwa
Se i masiku ndzin’wi veke tihlo
Loko a humelela ndza n’oka
Tshumba rivupfile,
Boxa Munwanati, do!!!
Nomo damarheli
Ripfalo vuyavuyani
Halahala, halahala senge ndzi lahle zukwa,
Ndzinga lahlanga nchumu
Loko ndzo kelu ndzin’wi vona arikuteni hile mpfhukeni,
Ndzi cinca na ndlela
Loko o phalakaxa kwala ndzinga kona,
Mbilu yaba senge yingo phohla xifuveni
Swandla swi sungula kujuluka,
Matsolo ya gundla gundla bya xihloka xa khale
Loko ndzi pfula nomo,
Ndzi tela hi manghanghamele
Ntombhi hundzi!!
Na nyamunthla switsandzile

Google GmailTumblrFacebookPinterestTwitterWhatsApp
Tagged with: ,
Posted in Poetry
Archives